小菜场，大乾坤（上）
来源：食品与生活
作者：杨忠明
沪语改写：丁迪蒙
诵读：顾天虹
小菜场大乾坤（上） 来自吳越小豬 00:00 06:30
老上海人低调，拿下饭个菜叫“小菜”，与之相对应个是有铜钿人家到西餐馆里去吃“大菜”。俗语“小菜一碟”指个是勿值得大肆宣扬，形容事情邪气容易办成功，小菜场里花样多，菜场虽小但乾坤大。
滑稽戏演员杨华生一曲上海说唱《小菜场》唱得是活灵活现，伊唱：“小菜场里真闹猛，荤菜素菜样样有，刚刚运到一批大冬瓜，一歇歇迎来交关带鱼鲞，只见带鱼鲞，就唱带鱼鲞……”
同治三年(1864年)外商拉波尔德里搭仔汉伯里经法租界公董局批准，出资勒法租界洋泾浜南岸宁兴街河边个空地浪搭大棚建造室内菜市场，定名“中央菜市场”，搿是上海最早个菜市场。宁兴街(现在个宁海东路) 早先就叫“菜市街”，我读小学个辰光，附近还有一片马路菜场。
我读书个小学勒老大沽路马立斯菜场南面个一幢老洋房里，每日天去读书侪可以闻到小菜场里一股股咸菜、带鱼、臭豆腐、黄豆芽、蚕豆壳咾啥个混合气味。大清老早，弄堂里向煤球炉子烟雾腾腾，黄鱼车浪向个大黄鱼金光灿灿，菜场旁边个公共厕所常常是客满个。
春天里，上海人家从小菜场里买回去荤菜、蔬菜，人客来了家常菜摆满一桌，有竹笋腌笃鲜、咸菜㸆毛笋、面丈鱼炒蛋、红烧塘鳢鱼、糖醋大黄鱼、韭菜炒蚬肉、目鱼大烤、咸菜豆瓣酥、马兰头拌豆腐干……
老上海大名鼎鼎个“三角地小菜场”勒虹口区，最早是一层楼个木结构，名字叫“虹口菜场”，有一百多年个历史，后来改建城为三层建筑，底层是卖各种蔬菜个，二层卖鱼、肉、鸡、鸭、火腿、腊肉、香肠、咸肉咾啥。搿搭个水发海味、鱼圆海鲜质量最好。三楼有得点心店、面店、小饭店，也有西餐店。《沪江商业市景词》里搿能介描述三角地菜场：“造成西式大楼房，聚作洋场作卖场。蔬果荤腥分位置，双梯上下万人忙”。
