画皮
来源:短章文字
作者:黎凡
沪语改写:边秦翌
指导:丁迪蒙
朗读:黄燕琼
(朗读者近照)
伊想,假使拿伊个人杀脱,会得哪能呢?搿个想法让伊邪气亢奋。
眼面前一片黑漆懵懂,伊勒勒自家个头顶心浪向摸来摸去,摸到了一粒小物事。搿是只拉链个拉手,邪气邪气小,囥勒头发里向,搭一根头发呒没啥两样。伊慢慢叫、轻轻叫,顺牢之头发、耳朵、胳络肢、一直到脚后跟,拿拉链统统打开,伊从皮里向钻出来了。
只要蜕脱身浪向个皮,伊马上就可以毫勿顾忌,做任何一桩自家想做个事体,搿是秘密,呒没任何一个人晓得!比方讲,伊可以去学告化子翻垃圾桶寻吃个物事;再比方讲,伊还可以搭暗暗叫欢喜个女同事过过销魂夜;又比方讲,伊还可以勒勒马路浪向象疯子一样乱喊乱叫,或者哇啦哇啦大哭……,而今朝夜里向,伊想杀一个人——就是伊个人。
伊邪气当心,拿皮慢慢叫个摊开来,摆勒沙发浪向,再轻轻叫拿皱褶个地方撸撸平。搿张皮,伊老宝贝个,勒皮浪向,勿但用脱伊交关钞票,还花费了伊老老多个精力搭仔心血,再加上后期个裱作,与时俱进个维护,老早就价值连城了。
伊手里向拿了把匕首,从阳台浪向跳下去,消失勒黑夜里。
搿扇门啊,伊实在是忒熟悉了呀!就算拿两只眼睛侪闭起来,伊还是可以一记头就摸到,交关趟数,伊点头哈腰个进去,又毕恭毕敬个出来,伊个人一直是笑咪咪个。
看到笑,就让伊看到了希望,但希望从来呒没成功过,邪气快又变成功了失望。勒失望搭仔希望个摇摆里,伊就像条鱼,摆勒火烫达达滚个油镬子里,炸得半熟然后又拨放生,真是让人生勿如死啊。
搿歇是半夜三更,搿扇门,现在关得邪气紧,阴森森个,严得一丝风也吹勿进去,像煞是一道令符贴勒夜幕里。
"嗖",伊跳到窗台浪向去寻进去个机会,哎,呒没想到,窗门浪向居然有条细缝!
卧室里向一眼声音也呒没,伊拿眼睛张张大,仔仔细细个看,床浪向,呒没人!伊轻轻叫退到客厅里,一个转身,有啥个物事碰着伊了,伊往旁边一躲,借牢仔灯定神一看!原来,就是伊个人!伊个人立勒角落头衣帽架旁边,笑咪咪个看牢仔伊。伊吓了一大跳,来勿及多想就拿起匕首拼之仔老命戳过去,寒光闪过,咦,哪能回桩事体啊?刀戳过去象煞是戳了丝巾高头一样――原来,搿只是一张挂在勒衣帽架浪向个笑咪咪个皮。
伊吓得来嘴巴张得老老大,呆了几秒钟以后,就来刹煞勿及个逃脱了。
回到屋里向,伊仔仔细细开始套自家个皮,从脚后跟、胳肢窝、耳朵、头发,一直到头顶心,伊慢慢叫、轻轻叫个拿拉链拉拉好,再拿拉链个头头囥勒头发里,恢复到原来个样子。卧室里向,太太睏得正香。看勒太太搿张熟悉个、漂亮个面孔,突然之间,伊个心别别跳,吓丝丝……吓丝丝……
来源:“吴越小猪”微信公众号
●【上海话朗读】小娘糯
●【上海话朗读】上海人个红木家具情结
●【上海话朗读】诚恳个农家小菜
●【上海话朗读】脚踏车情结
●【上海话朗读】勒了无荤腥个年代豪迈一呼“我勿是吃素个”,上海人勒吃啥?
●【上海话朗读】菜场协奏曲
●【上海话朗读】萝卜吃出肉价钿
●【上海话朗读】藏在荷心中的芸娘
●【上海话朗读】买菜
●【上海话朗读】今朝啥人免单
●【上海话朗读】轧户口米
●【上海话朗读】羊局长接电话
上海老底子
每天为侬送上精彩文章一组
打开尘封的记忆,寻觅往昔的岁月
叙上海老底子事
忆上海老底子人
诉上海老底子情
以史明志,以启未来
欢迎关注“上海老底子”的姐妹号:
魔都老底子
每天同步推送
感恩转发分享