买 菜
作者：郑自华
沪语改写：丁迪蒙
诵读：高丽群
推荐：丁迪蒙
（朗读者近照）
（作者近照）
记忆当中个买菜，侪是勒早浪，上班、读书去之前，“买汏烧”拉拎好竹篮头跑到小菜场。伊个辰光可以挑选个品种还有数量侪邪气少，去得晏了，只有落脚货，或者就干脆呒没了。计划经济年代，大家侪没啥选择个。但是，早浪到菜场去买菜个习惯，倒是深深个印勒脑子当中了。
上个世纪九十年代中后期，超市开始流行了，大家可以随时随地到超市去买，用勿着再去赶早了。到了超市，除脱仔买菜，还可以顺带便买一眼自家所需要个物事，正像一句广告语讲个：“超市是我家，东西随便拿”。人个买菜习惯勒勒悄悄叫个改变。搿些年互联网发展邪气快，电商也像雨后春笋一样冒出来了，再加上发达个快递，足勿出户，就可以买遍全世界，可以直接拿需要个宝贝送到屋里。
发达个网购成为了中国新个四大发明。但是，网购也有短板个，譬方新鲜蔬菜每日天要买个，小型化个家庭购买数量勿多，价钿勿贵，要支付运费，算算成本勿佮算，有个辰光运费要超过商品个价格。当然，也有包邮个，前提条件是要达到一定个金额，于是，只好再朝购物车里装物事，有网购经验个人侪晓得，要正好凑满搿笔金额几乎是勿可能个，经常是为了省几块洋钿个运费，只再增加十几块或者几十块钞票个商品，为了节省牵牛个绳子铜钿，却是多花了几倍于绳子个价钿。
有朋友搭我推荐了“叮咚买菜”小程序。据说，“叮咚买菜”邪气火爆，交奥菲司侪勒下班前头买菜，然后指定送到前台，下班拎了就走。
伊日天，我也尝试了一下，买了2根珍珠米550克3.89，2根落苏450克3.59，我特地到屋里附近个超市去做了对比，最起码便宜了20%，而且还蛮清爽，稍微冲一冲就可以烧了，关键是，承诺个半小时以内送货到家，保证可以做到个。
伊日天还真个碰着桩事体，朋友相邀吃饭，勿晓得啥地方弄得来条大黄鱼，想烧了，突然发现屋里向葱呒没了，想差人去买，离开菜场、超市还有一段路，再加上天气又是特别个热，我讲，用勿着，保证半个钟头会得有葱个，大家还当我勒讲白相，或者以为我会得变戏法。我拿出手机，点击“叮咚买菜”，购买了五角洋钿个葱，实在勿好意思，又买了点其他物事，也就是几块洋钿个物事。然后，大家眼睛侪盯牢仔墙浪向个钟勒看，果然，勒第25分钟个辰光，“叮咚”，门铃响起来了。一个小青年拎好马夹袋立勒门口头，袋袋浪还注明：啥辰光之前食用最好。我个搿些老年朋友侪拍手称赞，想勿到现在可以搿能买小菜。于是，大家侪向我请教，今后买小菜也准备去“叮咚”了。
来源：“吴越小猪”微信公众号
每天为侬送上精彩文章一组
打开尘封的记忆，寻觅往昔的岁月
叙上海老底子事
忆上海老底子人
诉上海老底子情
以史明志，以启未来
