“闷格子”
来源：旅游时报
作者：郑自华
文字改写：丁迪蒙
诵读：沈珊明
（朗读者近照）
上海人形容性格内向、闲话勿多个人叫做闷格子。“迭个人是‘闷格子’，三拳头打勿出闷屁个。”
要晓得啥叫“闷格子”，就先要晓得啥叫格子。所谓格子，是一般大家侪司空见惯个方形个空栏或者是框子。格子，因为伊方方正正而受到大家个欢迎，着格子衬衫个人会拨认为稳重大方。有段辰光，有种“格子铺”销售方式邪气流行，据说“格子铺”是从日本引进，勒城市繁华地带个商场里向，任何人只需要每个号头支付邪气少个费用，就可以租用一定规格个格子寄卖自家个物品，相当于拥有自家个一只“格子铺”，有专职人员代侬经营管理。花比较少个钞票，就可以圆老板个梦！“格子铺”是最大个限度利用空间，就像日常生活中阿拉看到个蒸馒头一样，除脱仔必要个空隙，馒头勒蒸笼个格子里向可以用密密麻麻来形容。
再联想到旧上海，小来西个年龄就拨父母从乡下头带到上海，经人介绍进纱厂工作，做了包身工。伊个辰光纱厂车间里热得像蒸笼，拿摩温还经常欺负工人。一日天要工作十几个钟头，人吃力得东倒西歪。包身工住勒格子笼里，搭“蒸格”里个馒头一样。由此，上海人欢喜拿格子笼搭仔鸽子笼联系勒一道，勿仅是因为读音一样，而且，格子笼搭仔鸽子笼呒没本质区别，鸽子笼，推板点个，就用铅丝扎只笼子，笼子里向鸽子轧勒一道，伊种臭味道，真是受勿了。勒“格子笼”里，包身工就像沙丁鱼一样轧勒勒一道，人之间起码个尊严搭仔隐私侪呒没了。夏衍个《包身工》，描写个包身工格子笼生活，就是伊个辰光真实个写照。
有眼勒上海有房子个也好勿到啥地方。老底子上海房子72家房客实在是勿少，面积比格子笼大勿了多少。前客堂、后客堂、前楼、后楼、前三层阁、后三层阁，还有二层阁，至于亭子间，还算是勿错个了。有更加困难个，住勒“滚地龙”里！在格子笼里生活，空气浑浊，空间狭小，呒没办法伸展手脚，呒没回旋余地，呒没私人空间，磕磕碰碰就是常态，人侪显得邪气压抑。因为压抑，闲话就少，脾气有点古怪。后来上海话拿伊引申出来，拿搿类人称为“闷格子”。
现在个白领，拥有个空间刚好也是一只格子，勒一尖大房间里，搿只格子里向“做生活”，格子搭格子之间用栏板分割，栏板邪气低，相对透明，有个办公室还有摄像头，因此，个人隐私、自家个空间侪呒没了，老板、人力资源部可以随时随地可以监控员工个行动。老板安排个工作量，勿仅拿8个钟头排满，还经常要加班，呒没加班费个。因为工作量大，上厕所有辰光也要小跑步，勒到厕所间去个路浪向，顺带便拿咖啡或者茶倒好。因此，现在个白领还有“闷格子”个另外一种形式——焦虑紧张综合症。
社会、家庭要给予搿眼“闷格子”多点理解搭仔关心，有更加多个宽容。从医学角度来讲，“闷格子”需要心理疏导，需要让伊有发泄个渠道。
现在是多元化个社会。人的性格有开朗、阳光，有急性子，同样也有“温吞水”、“闷格子”。为人低调，处事谨慎是一桩事体，但是假使讲“沉默是金”个做人原则，搭“闷格子”搭界，就有点勿符合逻辑了！
来源：“吴越小猪”微信公众号
每天为侬送上精彩文章一组
打开尘封的记忆，寻觅往昔的岁月
叙上海老底子事
忆上海老底子人
诉上海老底子情
以史明志，以启未来
