外滩情缘
作者：程介平
沪语改写、朗读：周红缨
指导、推荐：丁迪蒙
（朗读者近照）
拖拖拉拉个会议总算结束了，“叮铃铃……”，下班个铃声马上就响起来了，顾客陆陆续续从后门走出了商店。
老早就已经换脱了工作衣裳，着得山青水绿个小张，抬起手腕看看手表，急急忙忙走出商店朝马路对面个车站跑过去。车站浪向，有部开往公园个公共汽车齐巧要关门，小张快点朝前一步，推了推车厢里别人家个屁股轧上了车子。
“嘟嘟……”，汽车开了。迭个辰光，商店个大门刚刚关拢。
小张个工作邪气辛苦，也老卖力个。进单位呒没多少辰光，伊就拨评到了“五好战士”“青年突击手”，还做了团委书记。平常工作想准时落班是呒没可能个，勿是义务加班、就是参加会议。勒埃个工人阶级领导一切个年代，工人兄弟每日天工作8个钟头就可以了，而商业员工要做10个钟头，伊拉勿属于工人阶级，身浪向个“封资修”成分忒多，必欲劳其筋骨以正其心志。
终于可以搭工人阶级同工同时是勒改革开放后个1983年，比1866年马克思倡议8小时工作制整整要晏脱仔100多年，比19资本主义国家确认工人阶级8小时工作制也晏了60多年。
小张个女朋友也是商业系统个职工，两个非工人阶级年轻人，每日天个辰光就只有14个钟头，谈朋友只好约勒落班以后，太阳下山，月亮也已经出山个夜里向。不过小张个女朋友今朝请了病假，一个下半天荡勒公园里向，等小张下班搭伊约会。
汽车来到了公园门口。小张一下车，已经等得来心焦个女朋友迎了上来，露出勿满个表情对伊说：“侬倒是蛮准时个！”
小张苦笑了一记，抱歉个两手一摊：“啥人叫我是书记呢！”
女朋友车伊讲：“一个小小个团委书记就忙得团团转，以后做了真书记还勿忙煞人？啥地方有空谈情说爱啊！”
小张无奈个耸了耸肩膀，两只手一摊：“勿单单搿能，我还勒创业来！要晓得面包会得有个，牛奶也会得有个。”
一轮弯弯个残月升起勒半空当中，百花争艳，勒月前、灯下变得锦罗绸缎一样个丝滑晶亮。夜公园里向人多得来造反，想要寻只石凳或者是空地浪坐脱一歇是勿可能个，伊拉就一直勒公园个小路浪向走啊走。甜蜜个辰光总是嫌得忒少，夜里10点钟了，公园里个广播喇叭已经响“逐客令”了，小张再挎了女朋友个手臂从公园里出来。江滩、长堤，长堤下头不同风格个万国建筑群侪收入眼底。生了搿搭也长了搿搭个小张，从来也呒没像今朝搿能样子仔细欣赏过外滩个万国建筑。炎热个夏天，江边并勿见得有多少风凉，一点风也呒没，但人还是老多，一对一对轧勒一道，当中连一只拳头也塞勿进去。堤岸边浪有联防队员来回巡逻，手里拿仔个扩音喇叭负责个提醒江边搂搂抱抱个男女当心贼骨头，还有“反对资产阶级生活方式”之类个警告。
小张搭仔女朋友沿牢江边走过去，每隔一段辰光，一阵清脆悠扬个钟声就会勒耳朵边浪响起，整点个辰光还会得有音乐声敲响。从公园一直走到钟声响起个地方，堤岸浪向个人墙仍旧呒没伊拉能够轧进去个空间。好勿容易有了空隙，又拨一直勒江堤下头花坛浪坐等个一个男人一记头抢得去了。每个夜到，轧勒衣着单薄天热，人更加热个男男
来连脚底下阴沟洞里流动个水个声音侪能听见，空气当中还可以闻到一丝丝鱼腥味道，100年前搿搭只是一个小小个渔村滩涂。小张搂了女朋友个肩胛又转到江边一条小马路。伊拉呒没讲闲话，一句闲话也呒没，只是搿能互相依偎个走勒海。多少条马路又留下了伊拉两家头勿晓得吃力个默默个脚印，再次来到外滩个辰光，耳朵边浪又响起了悠扬个乐曲，随后呢，又敲响了12记钟声。
江边浪个人开始稀稀拉拉了，伊拉再有机会靠近堤岸。江当中传来江轮开过划出个水声。午夜个江风紧了，热气再稍微消退了一眼。小张背靠牢堤岸，拿女朋友紧紧个抱勒胸口头。女朋友薄薄个衣裙下头洋溢勒海个火热个青春，一记头就拿伊点燃起来了。两个人旁若无人个香面孔，互相楼抱勒海、感受到了来自对方个热情个体温。
突然之间，一个联防队员迓迓叫个出现勒伊拉两家头个面前。还呒没等小张反应过来，又来了一个联防队员，要拿伊拉“请得去谈谈”。小张勿肯“就范”，想到自家个名声、荣誉、前途侪要拨毁脱了，伊居然责问起联防队员伊犯了啥个错要拿伊带走？
埃个年代，联防队员个权力是老老大个，是发动群众、组织群众，消除勿安定因素搭仔勿安全隐患，减少各种违法犯罪活动个中坚力量。人家只晓得卖火柴个小姑娘向往温暖，勿晓得迪斯尼个灰姑娘憧憬爱情，公开读物浪向刊登灰姑娘搭爱德华公子接吻个剧照也是要到3年以后再有个事体。
勿晓得啥个辰光，老早已经人影稀疏个江边头聚拢起了一大批个人，一个个像勒看“西洋镜”一样个看牢仔伊拉。小张感觉自家变成了动物园里个活孙，勿得勿乖乖叫个跟伊位来到了联防队。
经过一番痛苦又持久个挣扎，联防队员告诉伊，女朋友已经交代了，勿要再做没用场个个抵抗，小张再交代了自家个姓名、工作单位，写下了“有碍观瞻”个事实以后拨“释放”了。
伊灰溜溜个回到了屋里向，五斗橱浪向一只玻璃罩已经裂脱了个三五牌闹钟敲了两记，就停脱了。小张穿仔个衣裳倒下去蒙仔头就睏觉。
第二天，天刚刚亮，小张就碌起来了，伊随便个揩了把面，揉了揉还呒没睏醒个眼睛，就拿起斧头“乒乒乓乓”摆开了“战场”——三人沙发个架子刚刚立起来，搿是小张“艰苦创业”个一部分，是“四十八只脚”当中个4只脚。但是啊，伊今朝伊呒没继续“创业”，而是挥起斧头朝牢辛辛苦苦打好个沙发架子砍过去。拨伊吵醒个姆妈看到了，呆了伊面勿响，一直到小张推起脚踏车出门去上班，伊再提心吊胆个跟出弄堂问：“到底发生啥个大事体了啦？”
搿桩事体对小张来讲确实是大事体，赛过天崩地裂。第二天，勒跨到店堂里书记寻伊谈闲话之后伊就生毛病了，而且毛病生得真是勿轻。书记要伊写检查，拿昨日子夜里个“事件”经过详详细细交代清爽，深挖资产阶级腐朽思想个根源。伊生下到现在第一次写检查，生仔个毛病写了三次，三次退回，讲伊是呒没触及灵魂。一直到猜出来书记讲个细节是啥意思之后，伊就索性拿“细节”扩写成一本报告纸介许多，写伊哪能拿舌头伸到伊个嘴巴里向，写伊个手摸了伊薄薄个衣裙下头身体个阿里个部位，甚至想像了勿勿少少“勿可描述”个细节。
还编造了交关肮脏勿堪个思想，搿能再过关。伊忒天真了，以为只要过关就好，一切侪会恢复正常。啥人晓得伊个检查拨当做手抄本勒大家手里向传阅，搿让伊从此抬勿起头来。甚至连得女朋友也看清了伊个灵魂介丑恶，搭伊一刀两断了。
伊实在是心灰意冷，到后来连自家也拨吓煞了，自家个内心思想竟然是介龌龊个。
埃个一年，恢复高考了，伊觉着搿是伊死白鱼跳龙门，千载难逢个机会，凭伊个聪明才智，考取大学有十分个把握。伊假使考取大学，就可一走了之，然后前程似锦。伊兴匆匆个跑到办公室寻书记开单位证明，但是书记却借口伊有“生活作风问题”“三观勿正”，勿得伊开证明。伊是讲勿出个苦呀，气得来只好辞职。
从此以后，小张每趟经过外滩侪要绕开伊段“花好月勿圆”个令人伤心个堤岸。
现在，时代变了，往事勿堪回首，小张，已经变成了老张，但是伊，仍旧会得回避搿一段伊无法回避个堤岸，即使是开车也要远远叫个绕开。
↑↑↑↑↑
更多上海话朗读精彩内容，请阅读和聆听《上海记忆》。
